Como de seguro xa saberedes, o vindeiro 25 de abril, despois de 15 anos na rede, Blogaliza pasará a ser historia. Por iso, o Lugar do Sapo procurou un novo acubillo en wordpress. Neste novo sitio continuarei a facer o mesmo: publicar artigos de temática varíabel cunha periodicidade aínda máis variábel. Como vedes, a estratexia para conseguir lectores é horrorosa! Mais o propio feito de perseverar cun blog en 2018 é xa un desastre tacticamente.

Por que continuar, logo? Pois porque si; porque me gusta, porque me peta e quero e dame a gana; porque me sae de dentro, alá do fondo… ben, sen excesivos dramas. Porque este Lugar do Sapo dáme a posibilidade de sacar fóra algunhas das tolemias que me ferven na cachola, como se da válvula dunha pota a presión se tratase.

Así que por aquí continuamos. Tratarei, na medida do posíbel, de ir recuparando algúns dos post publicados no vello site. Non porque teñan un grande interese, senón porque me dá mágoa que, como ánimas en pena, se perdan no purgatorio do ciberespazo.

Avanti!